نكتبلك ليك يا ضايع في غربة على أرضك
حافظ برشا كلام تحكيه لحفار قبرك
يا مزيان يا الي روحك تطلع في النهار ألف مرة
يا اللي تحلم بالجنة كذبوا عليك
قالولك غدوة الدنيا ليك تضحك
تتبسم تتنهد و بعينيها ترجع تحلم
بظفرتها بشركة هديتهالها
كلفتهالها بوسة و تعنيقة جابتلك الدوخة
يا اللي حبيت تكبر تخرج من الفقر و لميمة تفرح
طردوك من المكتب قالولك قليل حياء
و إنتي لا حيلة ليك لا دواء
و الوجيعة الوجيعة كي تتفكر كف وكلهولك الشايب
و خزرتو ليك يا عايق
عايق بالمات بالقراية اللي ليها ما تخلقتش
أما تراب اللي يمشي عليه تبوس
تبكي نتفكر سوايع البكاء تاع أمك و الهملة في الزناقي
هايم تدور من زنقة لزنقة تصيح تبراكي تعمل العرك تستبندى
و القلب ضعيف دم على الحالة
يا لميمة نحبك ما حبيتش هكة نحبك ما تمنيتلكش الغبينة أما أنا ضايع
غلطت سامحوني لواش تحقروني
لواش في عيشتي تكرهوني
مال الجدبن وافي و صنعة ليدين حلمة
أنا جاهل إسمي حروفو ما نعرفهاش و هوما ديار و قراية و هيلمان
نشكي بيهم لربي نحكيلو في ليلي على الفقر على النقمة على الهم على بهامتي
على الكفار و البنات اللي يخرجوا عرايا يتبختروا في الثنايا
يا لميمة حتى اللي نحبها غزرتلي و قاتلي ماكش بقرايتك و باغضتني
يا لميمة ما تكرهنيش عليا ما تتأففش ما تتكبرش راني غلطت
نشكي بيكم لربي نحكيلو على الدمار و السخط
نحكيلو على الإمام اللي ليه شكيت و قلت أحيت
قاللي يا وليدي إبعد على هالبر و حارب الظلم في بلاد الشام
حارب الكفر و تدخل الجنة عليك الأمان
يا لميمة نحبك حتى و كان في ربي نساتك ليام
نحبك حتى و كان بيا كفرت و عليا دعيت و في شكيت
يا لميمة ولدك شيحارب ...
نكتبلك ليك يا مزيان ياللي غرو بيك
كذبوا عليك بكاو والديك حطولك الجنة بين عينيك ضحكوا عليك
باعولك الأوهام الجنة و العبد ما يتمنى
قالولك شلزك قاعد في بلاد الميزيريا
بلاد الشيب و العيب الكذب و التبلعيط
بلاد ثورة ما جات شي جابت الدمار
زعمة عملوا آفار نحاو هم جابوا هموم
بلاد الكفر و المنكر العرا و القرا
لا رجال تحكم في النساء لا ماكلة لا عشا
تمشي تحارب جهنم تغادر
تسكرة لبلاد الأتراك و إنتي حر
تمشي تقتل البشر و تقضي على اللي كفر
إرسال تعليق